A Facultade de Ciencias Xurídicas e do Traballo acolleu este luns e martes, 23 e 24 de outubro, a cuarta edición do Congreso Internacional Carlos Fernández-Nóvoa, organizado en memoria do mestre fundador da Escola de Dereito Industrial de Galicia, e que nestas catro edicións se ten convertido en foro de referencia nacional das académicas e académicos que se dedican en España á propiedade industrial e da competencia. Nesta ocasión, desenvólvese baixo o lema ‘novas tendencias’, novidades que veñen da man da nova economía e da Intelixencia Artificial con todos os retos que isto trae consigo no que se refire aos dereitos de autor, competencia desleal, propiedade intelectual…
A apertura do encontro contou coa participación do director xeral de Xustiza da Xunta de Galicia, José Tronchoni, quen remarcou a idea de que este evento se esta a consolidar como principal encontro nacional dedicado ao Dereito da competencia, “un tema non menor se temos en conta todas as novidades que traen consigo as novas tecnoloxías”. Xunto a el, participaron na inauguración, o decano da facultade, Francisco Torres, e, en nome da familia do homenaxeado, o seu sobriño Luis Fernández-Nóvoa, socio director da oficina de Hoying Rokh Monegier en Madrid, un dos despachos de avogados que patrocinan este evento; e os catedráticos Anxo Tato e Julio Costas, directores do congreso. “Estamos nun evento de primeiro nivel no ámbito da propiedade industrial”, explicou o decano, Francisco Torres, docente da Área de Dereito Mercantil, organizadora da xuntanza. Pola súa banda, as primeiras palabras de Anxo Tato foron en memoria de Carlos Fernández-Nóvoa, “por todo o que nos deu e pola súa enorme xenerosidade no seu maxisterio”, e na mesma liña se pronunciou o representante da familia, quen agradeceu a organización dun evento “que honra a memoria do meu tío”.
A través de diferentes paneis, relatorios e mesas redondas, o congreso ofrece un foro de discusión sobre múltiples temas de propiedade industrial e competencia, sobre todo, enfocados a como afectan as novas tecnoloxías ao mercado. Entre outras cuestións, ao longo destes dous días falarase, por exemplo, sobre si a Intelixencia Artificial pode considerarse autora ou sobre si a relación coas boas prácticas da ecoloxía lles está servindo a algunhas empresas para branquear a súa imaxe.
II Congreso internacional de innovación docente
Organizado tamén desde a Área de Dereito Mercantil, en colaboración coa de Dereito Internacional Privado, o mércores arrancará en Vigo unha nova cita internacional, neste caso falamos do II Congreso internacional de innovación docente A ensinanza do dereito a debate. Será no edificio de sesións da Autoridade Portuaria -Peirao de Trasatlánticos- e nesta ocasión o eixe do debate serán os retos que se atopan os docentes á hora de ensinar Dereito, especialmente tendo en conta que o uso das tecnoloxías é un arma de dobre fío, que as materias -desde o Plan Boloña- son unicamente cuadrimestrais, etc. “A primeira edición funcionou moi ben porque se presentaron ferramentas como os podcast, probas similares a concursos, xogos de rol co alumnado…”, explican desde a organización. Falarase da ensinanza do Dereito en Europa, nos Estados Unidos e en Hispanoamérica, do emprego de xuízos simulados como ferramenta innovadora, da integración dos Obxectivos de Desenvolvemento Sostible no ensino do Dereito do Traballo ou, da obrigada adaptación das materias universitarias á dixitalización.