Este martes o Sindicato de Estudantes chamou á folga ao alumnado de ESO, Bacharelato e FP contra o acoso e os discursos de odio e para esixir maior inversión na educación pública para a atención da saúde mental do alumnado. En solidariedade cos seus compañeiros e compañeiras do ensino secundario, a Delegación de Alumnos/as da Facultade de Ciencias Xurídicas e do Traballo organizou unha xornada contra o acoso escolar e en lembranza de Sandra Peña, a rapaza sevillana vítima de bullying que se quitou a vida hai dúas semanas.
Os actos comezaron ás 11.15 horas cun paro académico de 15 minutos, unha concentración e a lectura dun manifesto, tras o cal se abriu unha quenda de intervencións para que a comunidade universitaria puidese tomar a palabra. Ao rematar gardouse un minuto de silencio e procedeuse a colocar unha pancarta en memoria de Sandra Peña na que o alumnado pode expresar o seu rexeitamento ao bullying e ás súas tráxicas consecuencias, e que lle será enviada á familia da moza andaluza.
Intanxible, replicable, volátil e facilmente manipulable ou alterable, parcial e heteroxénea son algunhas das características das probas dixitais, que son aquelas nas que está inserido algún elemento electrónico, informático ou dixital. “Actualmente é imposible comprender o proceso penal sen esta proba dixital, xa que se impón a máxima lóxica segundo a que, se a vida se desenvolve nun mundo tecnolóxico, a proba do que ocorre tamén haberá que buscala nesa contorna”, explica a catedrática de Dereito Procesual da UVigo e investigadora principal do proxecto La prueba penal ante la nueva realidad tecnológica en un contexto europeo, Esther Pillado González.
Logo de séculos circunscritas exclusivamente ao mundo analóxico, as probas nos procesos penais incorporáronse á era tecnolóxica e dixital, na que as TIC tamén teñen unha clara incidencia no ámbito da criminalidade e da xustiza penal, ben, como medio para desenvolver as propias conductas criminais (cíberdelincuencia ou cíbercriminalidade), ben, como medio para obter evidencias e probas dos delitos clásicos cometidos no mundo offline. “Segundo o Informe sobre cibercriminalidade en España de 2022, cometéronse preto de 375.000 feitos constitutivos de delitos informáticos, o que supón un 22,7% máis con respecto ao ano anterior. Na mesma liña, na Memoria de la Fiscalía General del Estado de 2023 ponse de relevo que un dos efectos perversos que se están a derivar da evolución tecnolóxica é o aproveitamento das TIC con finalidades criminais, circunstancia que está a xerar un claro desprazamento da actividade delituosa á contorna virtual”, detalla Pillado.
A Universidade de Vigo asinou este venres o convenio que permitirá a posta en marcha dunha nova edición, e xa van oito, do Curso de formación universitaria en negociación colectiva e individual no ámbito laboral, unha actividade xa consolidada dirixida á formación de profesionais nas técnicas de negociación e na solución de conflitos.
“E un tema que interesa especialmente nun intre no que as relacións laborais están suxeitas a constantes cambios e no que o papel da negociación colectiva é esencial para dotar de garantías ás persoas traballadoras e ás empresas”, explicaron os directores do curso, os docentes da Facultade de Ciencias Xurídicas e do Traballo Jaime Cabeza e Rosa Rodríguez Martín-Retortillo, que acompañaron ao reitor, Manuel Reigosa, e a presidenta do Consello Galego de Relacións Laborais, Antía Sández, na sinatura do acordo, un acto celebrado no despacho do reitor e ao que tamén asistiu o director do Centro de Posgrao e Formación Permanente, Fernando Cerdeira.
A Facultade de Ciencias Xurídicas e do Traballo deu a coñecer hoxe xoves os nomes das persoas gañadoras do Premio de Investigación Xurídica en Lingua Galega Xosé Luis Franco. O fallo foi anunciado no transcurso do acto de celebración do Día das Letras Galegas deste centro, no que o decano, Francisco Torres, puxo en valor este certame, impulsado polo profesor e coordinador de Normalización Lingüística Xosé Manuel Pacho. Torres lembrou que esta é a cuarta edición dun evento que é “para todo o noso centro, un acto súper especial e entrañable”.
O certame Xosé Luis Franco, que busca fomentar o uso da lingua galega no eido xurídico e poñer en valor os traballos de investigación realizados neste eido que aposten polo uso da lingua propia, comprende dúas modalidades. Na primeira, aberta a estudantado de calquera grao ou mestrado matriculado no sistema universitario de Galicia e do Estado, o xurado decidiu outorgar por unanimidade o premio ex aequo a dúas estudantes da USC: Rosalía Suárez Sánchez e María Otero Canabal. A primeira presentou un traballo sobre os delitos contra a liberdade sexual, os seus precedentes, regulación actual e o piar fundamental do consentimento. A segunda centrouse na relación laboral especial do servizo do fogar familiar, realizando unha análise xurídica dende a perspectiva da prevención de riscos laborais.
A Facultade de Ciencias Xurídicas e do Traballo acolleu esta semana as primeiras sesións dunha nova edición do Ciclo de Actividades sobre Dereito Marítimo, a décimo cuarta. O seminario, coordinado polo profesor Dereito Mercantil e decano da facultade, Francisco Torres, e a profesora e avogada Carmen Costas Martínez-Grimaldi, ten como obxectivo prioritario “ofrecer unha visión práctica do sector marítimo portuario con temáticas explicadas por profesionais con experiencia”.
Os seminarios e relatorios son de libre acceso e de balde para calquera persoa interesada, tanto da comunidade universitaria ou de fóra da mesma, e abordan diferentes aspectos. Como explican os seus impulsores, algunhas temáticas van variando ciclo a ciclo, mentres que “outras son seminarios que sempre ofertamos polo seu grande interese”. Este ano destacan as “actividades centradas nos efectos xeopolíticos e económicos das novas rotas de transporte marítimo e tamén, por primeira vez, abordase a cuestión da enerxía eólica mariña”, detalla Francisco Torres. En conxunto, os organizadores consideran que se trata dunha proposta “moi interesante para calquera persoa, sexa ou non da comunidade universitaria, que queira familiarizarse con tales materias”.
A contratación pública representa arredor dun 20% do Produto Interior Bruto de España, unha porcentaxe superior incluso ao considerado motor económico do país: o turismo. Conscientes deste contexto, a Facultade de Ciencias Xurídicas e do Traballo acolleu este martes unha xornada na que se analizaron os desafíos estratéxicos aos que se enfronta este relevante sector na denominada era da 4ª Revolución Industrial e na que se reuniron tres dos máximos especialistas de España en materia de Intelixencia Artificial e contratación pública, “tres pesos pesados do Dereito Administrativo español”: José María Gimeno Feliú, da Universidad de Zaragoza; Juli Ponce Solé, da de Barcelona, e Agustí Cerrillo Martínez, da Oberta de Catalunya.
Acudiron a este encontro convidados polos docentes Patricia Valcárcel Fernández e Rafael Fernández Acevedo, responsables do proxecto de investigación Desafíos estratéxicos da contratación pública na era da 4ª Revolución Industrial: sostibilidade, gobernanza e Intelixencia Artificial, financiado polo Ministerio de Ciencia e Innovación e ao abeiro do cal se organizou esta xornada.
“Quiñón”, “augas de pilla pillota e de torna a torna”, “serventía”, “esteiro”, “petróglifo”, “choupín” ou “fungo” son palabras que teñen en común, ademais de pertencer aos ámbitos xurídico, medio ambiental e micolóxico, que reflicten un vínculo entre o coñecemento especializado e a identidade galega. Estes termos sumados a outros 26 integran o primeiro glosario Escolma de termos científicos, un mini-diccionario de vocabulario científico e técnico, unha iniciativa da Unidade de Cultura Científica e da Innovación (UCC+i) da UVigo, co obxectivo de recoller e conservar termos científicos enxebres, procedentes de distintas áreas de coñecemento e vinculados co territorio propio.
Os docentes e investigadores da UVigo Xosé Manuel Pacho, Manuel Ángel Pombal e María Cabaleiro son os autores da escolma de termos nos ámbitos do dereito, o medio ambiente e a micoloxía, respectivamente, que se corresponden coas súas áreas de investigación e que escolleron pola súa relación co territorio, a cultura, as tradicións ou a historia. “Normalizar o uso do idioma propio no ámbito educativo, facer visible o traballo investigador que se realiza na Universidade de Vigo en galego e apoiar a investigación científica nesta lingua”, son os obxectivos da publicación, segundo explicou a vicerreitora de Comunicación e Relacións Institucionais, Mónica Valderrama, no acto de presentación do volume, que tivo lugar este mañá no edificio Redeiras.
Alumnado, PDI e PAS da Facultade de Ciencias Xurídicas e do Traballo, así como doutros centros do campus e o estudantado do Programa para o Emprego e a Vida Autónoma da UVigo participaron hoxe, estampando as súas mans, na elaboración dun mural co que a UVigo se suma á celebración do Día Internacional das Persoas con Discapacidade.
Baixo da dirección de persoal da Fundación IgualArte, os membros da comunidade universitaria empregaron diferentes técnicas pictóricas para elaborar unha pintura mural sobre papel na que as mans, dispostas en forma de aplausos, son as protagonistas deste día internacional que se celebra baixo o lema Aplaudir o talento das persoas con discapacidade.
“Uns aplausos que queremos que poñan en valor o talento de moitas persoas con discapacidade, uns aplausos que sirvan para que nos comprometamos, eliminemos a condescendencia ou a falta de expectativas destas persoas, xa que estas etiquetas son un obstáculo invisible que limita a súa aprendizaxe, o seu desenvolvemento e por ende a súa inclusión. Non se trata de aplaudir as accións cotiás, xa que estas discriminan e seguen fomentando a construción de muros. Temos que confiar no potencial das persoas e aplaudir o seu talento e profesionalismo”, sinala Maruxa Álvarez, directora da Área de Emprego e Emprendemento da UVigo.
“Aproximar aos estudantes á realidade da discapacidade, visibilizala, e que saiban que desde o Dereito se poden conseguir avances na integración dun colectivo que, por exemplo, segundo a Lei 3/2023, de Emprego, é de atención prioritaria nas políticas de emprego”. Así describe a profesora Rosa Rodríguez Martín-Retortillo, o obxectivo da Xornada sobre Integración Laboral das Persoas con Discapacidade celebrada este martes na Facultade de Ciencias Xurídicas e do Traballo e á que asistiron representantes de distintas institucións, tanto do ámbito académico como empresarial, e un amplo número de alumnas e alumnos dos graos en Dereito e en Relacións Laborais e Recursos Humanos.
Organizada pola Aula de Formación Legal da facultade, dirixida pola profesora Rodríguez Martín-Retortillo, a xornada achegou ás persoas asistentes á realidade da integración laboral das persoas con discapacidade, non só desde o punto de vista xurídico, senón tamén social. “Nesta aula buscamos tratar e debater temas de actualidade, ou necesitados de reflexión, cun enfoque xurídico pero tamén social”, explicou a docente na inauguración, intre no que estivo acompañada polo decano, o profesor Francisco Torres, quen destacou a importancia de organizar actividades de carácter multidisciplinar “que toquen varias materias e nas que saian contidos máis aló dos estritamente xurídicos que se abordan nas nosas aulas”.